Kezekten tys saılaý  – búkil halyq qalaýy

Elbasymyzdyń  prezıdenttik saılaýdy bıyl ótkizý jónindegi

Árbir sanaly qazaqstandyqtyń boryshy

Memleket basshysynyń ha­lyqqa Úndeýin muqııat oqy­dym. Qazirgideı tar kezeńde Nur­sultan Ábishuly Nazarbaev­tyń Qazaqstan halqy Assambleıasy Keńesiniń kezekten tys prezı­denttik saılaý ótkizý týraly bastamasyna kelisim bergenine qanaǵattandyq. Qazir álemdegi saıası-áleý­mettik jaǵdaı turaqsyz. Qar­jy­lyq-ekonomıkalyq daǵ­da­rystyń jańa tolqyny boı kórsetip otyr. Endeshe, osyndaı almaǵaıyp kúnderde barsha qa­zaqstandyqtar Elbasy N.Nazar­baevtyń tóńiregi­ne tyǵyz toptasýymyz qajet dep oılaımyn. Bul joly da Nursultan Ábish­ulynyń saılaýǵa qatysqanyn qalar edim. О́ıtkeni, Nursultan Ábishulynyń Otanymyzdyń irgesi bekigen táýelsiz memle­ket bolyp qalyptasýyna sińir­gen eńbegi sheksiz ekenin tek qazaq­­standyqtar ǵana emes, búkil álem biledi. Ár jyly halyqqa arnaıtyn Joldaýlarynda Otanymyzdyń damýyna eń qajetti degen keleli máseleler men tapsyrmalardy kóregendikpen, der kezinde qoıa bilýiniń arqasynda básekelestikke qabiletti eldiń qataryna engenimiz – N.Á.Nazarbaevtyń naǵyz Kóshbasshy ekeniniń dáleli. Nursultan Ábishulynyń endigi maqsaty – Qazaqstandy daǵdarystan aman-esen alyp shyǵyp, básekelestikke qabiletti 30 eldiń qataryna engizý. Qazaq handyǵynyń 550 jyldyǵyn toılaý arqyly Máńgilik Eldiń bedelin álemdik deńgeıde ulyq­taý, irgesin taǵy da bekite túsý. Búginde «Nurly Jol – bo­la­shaqqa bastar jol» Joldaýy boıynsha qarqyndy jumys bas­talyp ketti. Aldymyzda Elbasy eńbeginiń arqasynda jeńip alǵan EKSPO-2017 kórmesin ótkizý mindeti tur. Igi maqsatpen bastalǵan osyndaı úlken is-sharalardy tabysty aıaqtaý úshin Nursultan Ábishulyna múmkindik berý árbir sanaly qazaqstandyqtyń azamattyq boryshy dep bilemin.  Amangeldi SOPBEKOV, Ońtústik Qazaqstan oblystyq máslıhatynyń depýtaty. Ońtústik Qazaqstan oblysy.

Tilegimiz osy edi

Búkil ǵumyrym el ishinde ótip kele jatqandyqtan, ózim sııaqty adamdardyń qoǵa­my­myzdaǵy jaǵ­daılarǵa baılanysty peıi­lin, pikirin jaqsy bilemin. Jas memleketimiz bede­lin bıiktetip, áleýmettik áleýe­timizdi jaqsar­typ, bir­ligi­mizdi beriktirip, damý jolyna uıytqy bolýshy Tuńǵysh Prezıdentimiz N.Á.Na­zar­baev­tyń adal qyzmetine, orasan zor eń­be­gine rızashylyq sheksiz ekenine kúnbe-kún kóz jetip júr. Sondyqtan Qazaqstan halqy Assambleıasy Keńesiniń elimizde kezekten tys prezı­denttik saılaý ótkizý týraly bastama kóterýi oryndy boldy. О́ıtkeni, álem ekonomıkasyndaǵy qazirgideı kúrdeli kezeńde turaqtylyqty saqtap, keleshegimizge kepildi kúsheıtip, odan ári ósip-órken­deýdi qamtamasyz etý qajettigi ýaqyt talaby ekeni aqıqat. Jas memleketimizdiń ósý jol­dary kóz aldymyzda. Je­ńis­termen qatar, qıyndyqtar da az bolmady. Sonyń bárin Tuń­ǵysh Prezıdentimizdiń sarabdal saıasaty arqasynda eńserýimiz kópke málim. Osylaı bola berýin tileımiz. Sol múddemizge oraı Elbasynyń prezıdenttik saılaýdy bıyl ótkizý jónindegi búkil halyqtyń qalaýyn qabyl alyp, sheshim shyǵarýyn qýana qarsy aldyq. Buǵan baılanysty Qazaqstan halqyna Úndeýinde: «Álemdik ekonomıkalyq daǵdarys beleń ala túsken kezeńde halyqqa erteńgi kúnine degen senimdilik kerek. Bul, eń aldymen, jumys oryndarymen qamtamasyz etý, áleýmettik tólemderdiń, jala­qynyń, stı­­pendııalardyń turaq­tylyǵy», dep atap aıtqanyndaı, jarqyn bolashaqqa senimimiz zor. Qashanda úmitimizdi aqtap, keleshekke jol bastaýshy kemeń­ger Kóshbasshymyzdyń bul joly da qaıratymyzdy qaırap, ji­gerimizdi janyp, asqaraly maq­sattarǵa jete­lerine kúmáni­miz joq. Bárimiz­diń kókeıimiz­de­gini dóp basqan, kóńilimizden shyq­qan sheshim­di barsha qazaq­stan­dyq­­tardaı jańaarqalyqtardyń da qyzý qoldaýyn jetkizgim keledi. Qambar SEIITKAMALOV, Jańaaarqa aýdandyq ardagerler keńesi tóraǵasynyń orynbasary. Qaraǵandy oblysy.

Baq biz sııaqty tatý elge barady

Qazaqstan halqy Assam­b­leıa­synyń Keńesi kezekten tys prezıdenttik saılaý ótkizý týraly bastama kótergen bolatyn. Elbasy bul bastamany muqııat oı tarazysyna salyp, «kezekten tys prezıdenttik saılaý ótkizgen jón» degen paıymǵa keldi. Sondaı-aq, bul usynysty jahandyq sarap­shylar, qazaqstandyq qoǵam qaıratkerleri, zııaly qaýym ókilderi men elimizdiń túk­pir-túkpirinen túrli salada jumys isteıtin qyzmetkerler qol­dap, ózderiniń kópshilikpen ynty­maqtastyǵyn bildirip jatyr. Shyn mánisinde, bul saılaý jaı ǵana saılaý emes. Elbasymyz aıtqandaı, saılaý – asa mańyzdy konstıtýsııalyq jáne patrıottyq akt.  Bul saılaýda keleshegi kemel eldiń taǵdyry, ulttyń bolashaǵy sheshiledi. Bul saılaý arqyly álemdegi ekonomıkalyq jáne geosaıası aýyrtpalyqtarǵa qarsy aýqymdy keń qorǵanys sharasy jasalynbaq. Al naqty baǵdarlaıtyn bolsaq, prezıdenttik saılaýdy ótkizý – zańdy qubylys. Sondyqtan, shynynda elimizdegi basty saıası naýqandy keıinge shegerýge esh negiz joq dep oılaımyn. Bul – ýaqyt talaby. Bıylǵy jyl – elimizdiń ómi­rinde mańyzdy oqıǵalarǵa toly jyl. Elbasynyń «Nur­ly Jol – bolashaqqa bastar jol» atty Joldaýynda atap kór­setilgendeı, aǵymdaǵy jyly Qazaq handyǵynyń 550 jyl­dyǵy, Uly Jeńistiń 70 jyl­dy­ǵy jáne Qazaqstan halqy Assam­b­leıasynyń jyly men el Kons­tıtýsııasynyń 20 jyldyǵy keń kólemde atap ótilmek. Sondaı-aq, keleshegimizdi aıqyndaıtyn ekonomıkalyq baǵytta bilim berý salasynda birshama jobalardy júzege asyrý kózdelgen. Al osy ilkimdi isterdiń oryndalýy 2016 jylǵa túsip otyr. Sol sebepten de, jalpyhalyqtyq mańyzdy istiń erterek ótýine qoldaý kórsetkenimiz abzal. Qa­zaqta «Baq, qaıda barasyń? Kór­shimen bolǵan birligi, Merekeli tirligi, Uıymshyl elge baramyn», degen qanatty sóz bar. Bo­lashaǵymyzdy aıqyndap, kele­shegimizge jol ashar mańyzdy iske «bir jeńnen qol, bir jaǵadan bas shyǵaryp» qoldaý kórsetip, atsa­lysýǵa shaqyramyn. Darııa QOJAMJAROVA, Taraz memlekettik pedagogıka­lyq ınstıtýtynyń rektory, respýblıka Ulttyq ǵylym akademııasynyń korrespondent-múshesi. Jambyl oblysy.

Qalaýymyz – tutastyq

«Biz qazaq mal baqqan elmiz. Eshkimge soqtyqpaı jaı jatqan elmiz. Elimizden qut-bereke qash­­pa­syn dep, jerimizdiń shetin jaý baspasyn dep, naızaǵa úki taq­qan elmiz», degen ǵoı Qaz daýys­ty Qazybek bı. Bul – bizdiń jurt­tyń búkil bolmys-bitimin ashatyn sóz. Keńpeıildigin, jomart­ty­ǵyn, qonaqjaılyǵyn, beıbit­shi­liksúıgishtigin dál kórsetken, anyq aıtqan, kórkem kestelengen osy sýretteý búgingi qazaqqa da tán. Syn saǵatynda bir jeńnen qol, bir jaǵadan bas shyǵaryp, eldiń ty­nyshtyǵy men turaqtylyǵyn bas­ty qundylyq sanaıdy bizdiń jurt. Qazaqstan halqy Assambleıasynyń kezekten tys prezıdenttik saılaý ótkizý týraly usynysyn halqymyz memleketimizdiń baıandy bolashaǵy, kemel keleshegi úshin jasalǵan jaqsy qadam retinde qabyldady. Sondyqtan birtutas qoldap, qýattap, Elbasyna arnaıy hat joldap, saıası sheshimdi qabyldaýdy surady. Prezıdent Nursultan Nazarbaev halyqtan túsken ótinish-tilekterdi tyńdap, oı eleginen ótkizip, tereń saraptap, óziniń kesimdi sózin aıtty. Sonymen, prezıdenttik saılaý 26 sáýirge belgilendi. Bul der shaǵynda, dál ýaqytynda qabyl­danǵan sheshim boldy. Elbasy óz Úndeýinde prezı­denttik merzimdi referendým ar­qyly sozǵannan góri kezekten tys saılaý ótkizgen durys dedi. Álemdik saıasat qym-qıǵash keıip­ke enip, daǵdarystyń daýysy zoraıa túsken myna shaqta eldiń bola­sha­ǵyn aldyn ala aıqyndap almasa bolmaıdy. Mundaı kezeńde bizge eń aldymen tynyshtyq pen tatý­l­yq kerek. Alaýyz bolmaı, arazdyqqa barmaı, bir qoldyń salasyndaı, bir úıdiń balasyndaı aýyz­­birshilikte bolsaq qana alda tur­ǵan qıyndyqtardy eńsere alamyz. «Jer betinde sany qansha mıllıon bolsa da týyn tiger ultaraqtaı jerdi, urpaǵyna mıras eter eldi arman etken ulttar qanshama! Eli bolǵanmen baǵdary joq, baǵdary bolǵanmen berekesi joq halyqtar da kóz aldymyzda. Qazaqstan damý kóshine ilesken elderden sýyrylyp shyǵyp, kósh tizginin ustaǵan elderdiń sanatyna bet aldy»,– dedi Memleket basshysy. Shekarasy bekitilgen jerimiz bar, birtutas elimiz bar. Baǵytymyz aıqyn. Baǵdarymyz anyq. Sondyqtan damýdyń kóshine erkin engen halqymyz aldaǵy saıası sátte óziniń bolashaǵyn adaspaı tańdaıdy dep oılaımyn. Seıilbek ShAÝHAMANOV, Qyzylorda oblystyq ardagerler keńesiniń tóraǵasy. QYZYLORDA.

Senimdi serpiliske jeteleıdi­

Qazaqstan halqy Assambleıasynyń kezekten tys prezıdenttik saılaý ótkizý týraly bastamasy el tarapynan qyzý qol­daý tapty. Osyǵan oraı Elbasy Nursultan Nazarbaev Qazaq­stan halqyna Úndeýin joldady. Kezekten tys saılaý ótkizý jónindegi sheshim geosaıası jáne syrtqy saıası jaǵdaılardy uǵynýdan týyndap otyr. Búgingi jahandyq ózgerister tıisinshe zerdeli is-qımyldy, naryqqa jedel beıimdelýdi, halyqaralyq jáne ishki saıasatqa tyńǵy­lyqty den qoıýdy talap etedi. Elbasy Úndeýin D.Serik­baev atyndaǵy Shyǵys Qa­zaqstan memlekettik teh­nı­kalyq ýnıversıtetiniń ujymy qyzý qoldaıdy. Biz­diń ýnıversıtette óńir­degi Qazaqstan halqy Assam­bleıasynyń ǵylymı-sarap­tamalyq tobyna múshe bolyp engen ǵalymdar eńbek etedi. Iаǵnı, ǵalymdarymyz Elbasy Úndeýin qoldaýmen birge, elimizdegi turaqtylyq pen tatýlyq tuǵyrynyń ǵylymı negizdemesin tereń túsinip, qoǵamǵa jetkizýge yqpal etip keledi. Keshe ǵana ýnıversıtettiń ǵylymı keńesinde kezekten tys prezıdenttik saılaý ótkizý týraly professor-oqytýshylar quramy sóz sóılep, onyń qazirgi mańyzy jóninde tushymdy oı-pikirlerin ortaǵa salǵan bolatyn. Osy oraıda, ǵylymı áleýetimiz ben shákirtterimizdiń úni Úndeýmen úılesim taýyp, bir arnada toǵysty. Memleket basshysynyń qazaqstandyq damýdyń dańǵyl jolyna baǵyttaǵan batyl da baǵdarly saıasaty barshamyzǵa senim uıalatady. Prezıdenttik saılaýdy bıyl ótkizýdiń tıimdiligin eki turǵyda qarastyrǵan lázim. Birinshiden, keler jyly kún­tizbede parlamenttik saılaý ótedi. Elektorattyq naý­­qandy eki saılaýǵa jumyl­dyrǵan elimiz úshin tıim­siz. Ekinshiden, osy saılaý arqyly elimizdiń ekono­mıkalyq jáne saıası márte­besi saqtalady. О́ıtkeni, álem­degi qarjy daǵdarysy men birqatar elderdiń ishki turaqsyzdyǵynyń kúsheıýi kezeńinde biz Táýelsizdik jyldary qol jetkizgen ­basty baılyǵymyz – birlik-berekemizdi saqtap qalýy­myz tıis. Elbasynyń basshy­ly­ǵymen birge biz barlyq qı­yndyqtar men keder­gilerdi jeńip shyǵyp, tabysqa qol jetkizdik. Memleket bas­shy­synyń jetekshiligi­men búginge deıin daǵdarystyń úsh tolqynyn ótkerdik. Kezekti jahandyq kúrde­li jaǵdaıda da Elbasy­nyń kóregen saıasaty eli­mizdi senimdi serpiliske jeteleıdi. Nurlan TEMIRBEKOV, D.Serikbaev atyndaǵy Shyǵys Qazaqstan memlekettik tehnıkalyq ýnıversıtetiniń rektory, respýblıka Ulttyq ǵylym akademııasynyń korrespondent-múshesi. О́SKEMEN.

Bul – jaýapty shaq

Saılaý – demokratııalyq qoǵamnyń asa mańyzdy kórinisteriniń biri. Ár azamattyń osy úderiske qatysýy, daýys berýi el bolashaǵynyń qandaı bolatynyn sheshedi. Keshegi Úndeýinde Elbasy halyqtyń múddesine oraı, onyń ótinishin, jalpyǵa ortaq erik-jigerin esepke ala otyryp, Negizgi Zańdy buljytpaı saqtaý úshin men Konstıtýsııanyń 41-babynyń 3-1 tarmaǵyna sáıkes sheshim qabyldap, 2015 jyldyń 26 sáýirinde kezekten tys prezıdenttik saılaýdy belgileý týraly Jarlyqqa qol qoıdym, dedi. Iаǵnı, birlik pen kelisim ornaǵan elimizde órkendeý de, damý da bolatynyna senimdi ekenimizdi jetkizdi. Osy maqsat ári qaraı da jalǵasa berýi úshin birlesip qyzmet etýge shaqyrdy. «Eldiń birligin nyǵaıtyp, Otanymyzdy kórkeıtýge baǵyttalǵan kez kelgen usynys men úshin qundy», – dep atap ótti. О́ıtkeni, bárimizge belgili, bizdiń elimiz qazir 30 eldiń qataryna qosylý jónindegi «2050» Strategııasyn júzege asyrýǵa kiristi. Bizdiń aýdanymyzda da ákimdik bastamasymen kóptegen sharalar atqarylýda. Qazir shalǵaı jatqan Qyzylaǵash aýylynda mektep qurylysy júrgizilýde. Shalǵaı aýyldarda Amantaı Mýsın, Nıkolaı Mıller degen iri sharýashylyqtar­dyń qojaıyndary turady. Aýyldyqtar olar bas­qa­ratyn egin jáne mal sharýa­shylyqtarynda eńbek etýde. Bul ondaǵan jumys orny, aýyldyqtar jumyssyz emes degendi bildiredi. Árıne, qıyndyqtar ár iste kezdesedi. Másele sol qıyndyqtardy jeńip, ornyqty tirlik qurýda ǵoı. Barlyq Elbasy Joldaýlary eńbekke, damý jolyna, órkenıettilikke, ortaq Otandy órkendetýge úndeıtini de sondyqtan. Bizdiń aýdanymyz, mysaly, Reseı aýdandarymen shektesedi. Rýhanı-mádenı baılanys barysynda ótkizgen qandaı is-sharalar bolsyn bizdiń elimizdiń birlik, tatýlyq maqsatymyzdan qazaqstandyqtar úlgisin, Otanǵa degen ortaq súıis­penshilikti kórsetip maq­tanysh etemiz. Bul múdde jolyn Elbasy «búgingi biz­diń qazaqstandyq minez-bitimimiz osyndaı! Birlik pen Turaqtylyq – bul bizdiń ­jaýapty tańdaýymyz!» degen tamasha baǵa bergen sózderimen atap ótti. Osy Úndeýde «qazaq­stan­dyq minez-bitim» degen jańa ataý paıda boldy. Aldaǵy saılaýda da el tarıhyndaǵy taǵy bir taǵdyrly oqıǵaǵa erekshe jaýapkershilik osy qazaqstandyq minez-bitim arqyly kórinis tabady dep oılaımyn. Ǵalymbek QAIYRYSQAQULY Ertis aýdandyq ákimdigi ishki saıasat bóliminiń bastyǵy. Pavlodar oblysy.